الاعتراف(1)
رغم الكلام الما اتنطق
والبين عيونك منكشف
خطوات مع التيار مشت
ساساقا في دربا خرف
بعد الاوان ولي ورحل
الليلة جيت داير اعترف
صدقني مزهل من زمان
من الحنين صار منصرف
اصبحت كشكول من هموم
مكسور وحاير ومنكسف
ياريتو قلبي انا ما شعر
ولحتي يوم للحب عرف
سكبت أروع ما أحوز
من جملة الشعر الوصف
جملت كل أشعاري بيك
موزونة بي علم الصرف
وأغرقت جنباتك حنان
سيل من دواخل مابتجف
حصل الحصل قول لي كيف
كان بي وتر حزنا عزف
هتك المشاعر والشجون
وهد جوف الحيل نتف
والكلمة صبحت سيف موتتد
وفي الدواخل دم نزف
الكلمة كانت ليل موسد
في انتظار قمرا خسف
الكلمة كانت مد كاسر
هد حيل القيف نسف
الكلمة كانت قصر شامخ
مدماكو بي الغر اترصف
ابحر علي الماضي الزمن
وتعودبنا الايام تلف
تلقاني في نفس المكان
الا الزمان بس مختلف
برضو الطموح والانفتاح
بينا الشسوع المنعطف
ورجعت حييت من جديد
ورديت عليك رغم الاسف
ورجعت محتاج للزمان
من دم عيونو أداك غرف
وطعنتو في ضهر الولف
وأبعد بعيد منك وقف
مادامك انت احتجت لي
اديك دماي من غير أسف
عشان تكون العبرة ليك
ولي قلبك انت اللي نشف
الشر نقابلو بكل خير
يا ريت زمان قلبك عرف
ياهو التمن بعد الحصل
تقول لي يا باش الولف
وينو الولف ولي وطفش
وينو الحنين جف ونشف
وينو الوفاء معدوم بتات
وتمن الحصل انسان تلف
اخر المطاف كانت قناعة
احساس جديد مابتوصف
ختيتو بين ايديك يا باش
وريني رد زولا عرف
والامضاء بين قوسين تحت
من زول موجع وبعترف
الخرطوم 2002
